ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանի վերջին տարիների գործունեությունը սահմանափակվում է նրանով, որ նա ժամանակ առ ժամանակ ահազանգում է այս կամ այն ծառայության հնարավոր թանկացման մասին, իսկ հետո փորձում է հիմնավորել, թե ինչու է դա անհրաժեշտ: Ու մինչ Նազարյանի ամեն մի տեղեկատվությունից հետո շարքային քաղաքացիները սկսում են մտածել, թե մինչև որ աստիճանը կարող են ձգել իրենց գոտիները, Նազարյանի մոտ ճիշտ հակառակ պրոցեսն է ու հեռու չէ այն օրը, երբ նա կարող է յոլա գնալ նաև առանց գոտու:

Ռոբերտ Նազարյանը, որ ամեն քայլափոխի հայտարարում է, թե երբեք բիզնեսով չի զբաղվել և ողջ գիտակցական կյանքը նվիրել է հայրենիքին ծառայելուն, այսօր հանրապետության ամենահարուստ մարդկանցից մեկն է: Ու քանի որ Հայաստանում պարզապես անհնար է չոր աշխատավարձով միլիոններ կուտակել, ապա Նազարյանի խոսքերին վստահողների թիվը մեծ չէ կամ կարելի է ասել` ընդհանրապես նրան հավատացող չկա:

Այդ ընթացքում այս համեստ ծառայողը, միայն աշխատավարձի վրա հույս դրած, արդեն այնքան հարստություն ունի, որ նույնիսկ իր ներկայացրած գույքի և եկամուտների հայտարարագրի թերթիկը չի բավականացնում այդ թվերը գրանցելու համար: Իսկ փաստաթղթում, ի դեպ, ասված է, որ 2014 թվականի վերջին նրա դրամական միջոցները կազմել են 9 մլն դրամ և 110 հազար դոլար: Նրա անցած տարվա եկամուտը կազմել է 10 մլն 38 հազար 538 դրամ:

Բայց այսքանից հետո կա մեկը, ում Նազարյանը կարող է նախանձով նայել: Դա իր հարազատ կինն է: Նազարյանի կինը` Սվետլանա Խառատյանը, փաստացի ամուսնուց ավելի մեծահարուստ է, որովհետև վերջինս հայտարարագրել է 300 հազար դոլար դրամական միջոց, իսկ նրա տարեկան եկամուտը կազմել է 24 հազար 450 դոլար, որը նա ստացել է որպես փոխառության դիմաց վճարված տոկոսադրույք: Չի բացառվում, որ տիկինը նաև ամուսնուն է տոկոսով փող տալիս: Քանի որ ուրիշ էլ ինչպե՞ս պիտի ապրի աշխատանքային հոգսերի մեջ թաղված, համեստ ռոճիկով ապրող մարդը, ով առավոտից մինչև գիշեր մտածում է, թե ինչպես կարգավորի հանրային ծառայությունները ու ոչ մի կերպ դրանից գլուխ հանել չի կարողանում: