«Եվգենի, ապոմնիս»,- խորհրդարանի դահլիճում այսօր բացականչեց պատգամավոր Տիգրան Ուրիխանյանը՝ ազդարարելով այն մասին, որ ՀԷՑ-ի գլխավոր տնօրեն Եվգենի Բիբինը արհամարհել էր իրեն արված հրավերը և չէր ներկայացել Ազգային ժողովում ընթացող քննարկումներին: Իրականում էլեկտրաէներգիայի սակագնի վերաբերյալ հրավիրված խորհրդարանական լսումներին ՀԷՑ-ի ղեկավարությունն իրավունք չուներ չներկայանալ։ Սակայն իրավունքն ու կամքը տարբեր բաներ են ինչպես Բիբինի, այնպես էլ շատ ուրիշների համար, որոնք այսօր մեր երկրում տնօրինում են այս կամ այն հանգուցային ոլորտը: Եվ նույն Ուրիխանյանը իր պաթետիկ բացականչությունից հետո ստիպված պիտի լիներ նվազ ոգևորիչ ձայնով լրացնել. «Գող, սիրտը դող։ Այս հարցին ոչ մի պատասխան։ Իսկ էլեկտրաէներգիայի սակագինը բարձրանում է, իսկ վճարողը քաղաքացին է»:

Հերթը քաղաքացուն դեռ կհասնի, հիմա ընթացքում պաշտոնյաներն են: Օրինակ, ՀՀ Հանրային ծառայությունները կարգավորող հանձնաժողովի ղեկավար Ռոբերտ Նազարյանը, ով մինչև երեկ կուրծքը դեմ արած պաշտպան էր կանգնում ՀԷՑ-ի քաղաքականությանը: Բայց այն բանից հետո, երբ Բիբինը հարցազրույց տվեց ու ամբողջ մեղքը բարդեց հայկական կողմի վրա, Նազարյանի տրամադրությունը շրջադարձային փոփոխության ենթարկվեց: Ու հիմա նա այնքան համարձակ է դարձել, որ խորհրդարանի ամբիոնից կարող է ասել. «Հայաստանի էլեկտրական ցանցեր» ընկերության գլխավոր տնօրեն Բիբինը թույլ է տալիս իրեն մոլորեցնել հանրությանը: Նա ասում է, որ բազմիցս հայտարարել է դժվարությունների մասին, բայց ոչ ՀՀ Հանրային ծառայությունները կարգավորող հանձնաժողովը, ոչ կառավարությունը ոչ մի բան չեն արել: Պարոն Բիբինը ստում է»:

Բիբինը կարող է ստել, բայց ժողովրդին մոլորեցնում է ոչ թե նա, այլ Ռոբերտ Նազարյանն ու նրա նմանները: Ու քանի որ շատ հաճախ փոս փորողը հենց ինքն է հայտնվում այդ նույն փոսում, ապա այժմ բավականին ներքև սահած Նազարյանին ոչ միայն չեն ցանկանում ձեռք մեկնել, այլև հավատ ընծայել: Դրա համար էլ, երբ ՀԾԿՀ ղեկավարը մատնանշում էր Բիբինի ստախոսությունը, դահլիճն այլ կերպ արձագանքեց այդ մեղադրանքներին: Մասնավորապես, պատգամավոր Աղվան Վարդանյանը նկատեց. «Ուղիղ մեկ տարի առաջ Հանրային ծառայությունները կարգավորող հանձնաժողովը նույն հիմնավորումներով ապացուցում էր, որ անհրաժեշտ էր թանկացնել էլեկտրաէներգիան։ Այդ ժամանակ որևէ խոսք չկար ընկերության վատ մենեջմենթի մասին։ Մինչդեռ, այսօր պարզ է դառնում, որ ՀԷՑ-ում տիրող ֆինանսական վատ վիճակի մասին տեղյակ են եղել և լռել են, քայլեր չեն ձեռնարկել»:

Իսկ այս բոլորից հետո ավելի հասկանալի է դառնում, թե Եվգենին ինչու իր ներկայությամբ չպատվեց հայ խորհրդականներին: Թող նախ նրանք գնան ու իրենց միջի մեղավորներին փնտրեն, իսկ երբ հերթը կհասնի Բիբինին (եթե հասնի), նա բացատրություններ կունենա: Նրա երկիրը Հայաստանը չէ և մեծ հաշվով Բիբինը ոչ թե լկտի վերաբերմունք է դրսևորել խորհրդարանի նկատմամբ, ինչպես զայրույթով նկատեց պատգամավոր Նաիրա Զոհրաբյանը, այլ ուղղակի թքած ունի: