Այն բանից հետո, երբ Հայաստան-Ալբանիա (0-3) խաղի մասին սերբական մամուլը սկանդալային տեղեկություն հրապարակեց, թե իբր Հայաստանի հավաքականը 2 միլիոն խաղը վաճառել է ալբանացիներին, Հայաստանի ազգային հավաքականի և ՀՖՖ ղեկավարության հասցեին քննադատությունների ու մեղադրանքների պակաս չի զգացվում: Այս օրերին, եթե որևէ լրագրող փորձում է ՀՖՖ ղեկավար Ռուբեն Հայրապետյանից բացատրություն ստանալ կատարվածի առթիվ, վերջինս միայն զայրացած պատասխանում է. «Սիրտ չունեմ»: Ու անջատում է հեռախոսը:

Բայց եթե Նեմեց Ռուբոն սիրտ ու հավես չունի այդ մասին խոսելու, ապա հայ սրամիտ հանրությունն այս անգամ պարզապես գերազանցեց ինքն իրեն:

Հայտարարությունների List.am կայքում, որտեղ սովորաբար առքուվաճառքի մասին ազդագրեր են տեղադրվում, քաղաքացիներից մեկը զետեղել է հետևյալ գրառումը. «Վաճառվում են Աշխարհի Առաջնության ընտրական փուլի խաղեր: Վիճակը` նոր: Սակագներ` 0-1= 1 միլիոն ամերիկյան դոլար, 0-2 = 1,5 միլիոն դոլար, 0-3 = 2 միլիոն դոլար (Սակարկելի): Առկա են նաև Հայաստան-Ղազախստան, Հայաստան-Դանիա, Հայաստան-Ռումինիա և Հայաստան-Մոնտենեգրո խաղերը: Հնարավոր են նաև այլ ծառայություններ: Խնդրում ենք զանգահարել նշված հեռախսահամարով՝ (010) 56-88-83 (Ռուբեն ) կամ այցելել Խանջյան 27 (09.00-18.00)»:

Ինչպես դժվար չէր կռահել, հայտարարության մեջ նշված են Հայաստանի ֆուտբոլի ֆեդերացիայի հասցեն և հեռախոսահամարը: Ազդի հետ միաժամանակ հրապարակված է Հայաստանի ազգային հավաքականի լուսանկարը: Հայտարարությունը հրապարակված է «Շտա՛պ» գրությամբ: Ու եթե վաղը Ռուբեն Հայրապետյանը արտերկրից զանգեր ստանա՝ հատուկ առաջարկությունների տեսքով, ապա հազիվ թե կարողանա օտար լեզվով նրանց պատասխանել, որ սիրտ չունի: Նա ուղղակի հայերենով կարտասանի բոլորիս սրտին մոտ արտահայտություններ...