Ամերիկայի Միացյալ Նահանգների ժողովրդավար ու հումանիստ ոգին իր բազում դրսևորումներն է գտել տարատեսակ խորհրդանշաններում: Ամերիկացիներն այդ բանի համար ջանք ու եռանդ չեն խնայում: Բայց երբեմն պատահում է այնպես, որ որոշ բաներ դուրս են լողում ջրի երես ու աղճատում են երևութական գեղեցկությունը, որ հրամցվում է աշխարհին իբրև վառվռուն փաթեթավորում:

Օրերս պատկերը փչացողների շարքում հայտնվեց ԱՄՆ Նյու Յորք նահանգի Ուայթսբորո բնակավայրը: Հանկարծ բոլորի աչքերը բացվեցին ու մարդիկ տեսան, որ այդ գյուղի զինանշանի վրա պատկերված է սպիտակամորթ մի տղամարդ, որը խեղդում է բնիկ հնդկացու: Այն, որ զինանշանն անհիշելի ժամանակներից կախված էր եղել ամենուր և նույնիսկ փակցվել ոստիկանական մեքենաների վրա, թույլ է տալիս վստահորեն ասել, թե տեղացիների համար դա որքան սովորական, նույնիսկ կարելի է ասել՝ առօրյա պատկեր է:

Անգամ աշխարհի ամենաբարբարոս ու դաժան ազգերն իրենց գերբերի վրա չեն պատկերել այսպիսի անմարդկային տեսարան, ինչպես դա արել են ազատասեր ամերիկացիները: Կամ գուցե նրանց ազատության մասին պատկերացումները հենց այդպիսին էլ կա՞ն և այդ պատճառով էլ, երբ ստորագրահավաք հայտարարվեց գերբի պատկերը փոխելու համար, ոչ բոլոր քաղաքացիները միացան դրան:

Ի դեպ, սա եզակի դեպք չէ: Օրինակ, այս օրերին Օհայո նահանգի մի խումբ աթեիստ քաղաքացիներ դատական հայց են ներկայացրել ԱՄՆ դաշնային դատարան՝ պահանջելով թղթադրամներից հեռացնել «In God We Trust» («Մենք հավատում ենք Աստծուն») արտահայտությունը: Նրանք համոզված են, որ այդ արտահայությունն ուղղակիորեն խախտում է սահմանադրական նորմերը: Նախաձեռնության հեղինակները պարզաբանել են, որ նրանք ամեն օր ձեռքերի մեջ պահելով թղթադրամները, որոնց վրա հիշատակվում է Աստծո անունը, զգացողություն են ունենում՝ կարծես ինչ-որ մեկը միջամտում է իրենց ֆինանսական գործերին: Իսկ փողն, ինչպես հայտնի է, այս երկրում վեր է Աստծուց: Փողն իրական կրոնն է, իսկ խեղդվող հնդկացին` այդ կրոնին զոհաբերված մատաղացուն: