Մեկնարկել են նոր տարանցիկ երթուղու կառուցման նախագծի շուրջ աշխատանքները: Այն Իրանի հարավային Բենդեր Աբաս նավահանգիստը ԱՊՀ տարածքով կկապի ԵՄ-ի հետ: Երթուղին բաղկացած կլինի երկաթուղուց և ավտոճանապարհային մայրուղուց: Այն կանցնի Վրաստանի և Ադրբեջանի տարածքներով: Նախագծին կմասնակցեն Ռուսաստանն ու Ֆինլանդիան: Հայաստանը դարձյալ դուրս մնաց խոշոր տարածաշրջանային տնտեսական նախագծից սեփական պասիվության և հայաստանյան իշխանությունների սպասողական քաղաքականության պատճառով, ասում է ՌԳԱ Եվրոպայի ինստիտուտի ԱՊՀ երկրների ռազմավարական զարգացման կենտրոնի տնօրեն Ալեքսանդր Գուսևը: «Ադրբեջանը դրսևորել է նախաձեռնողականություն և հրաշալի օգտագործել է Իրանի հանդեպ պատժամիջոցների վերացման հանգամանքը: Միևնույն ժամանակ, Հայաստանը կորցրել է Իրանի հետ համագործակցության բազմաթիվ հնարավորություններ, չնայած որ Հայաստանն ավելի շատ հնարավորություններ ուներ խորացնելու Իրանի հետ տնտեսական հարաբերությունները, քան Ադրբեջանը»,- ասել է Ալեքսանդր Գուսևը: Նրան խիստ ապշեցրել է Հայաստանի ղեկավարության ակնհայտ անգործությունը:

Հայաստանի ղեկավարության անգործության մասին խոսում են անգամ այլ երկրների պաշտոնյաները և ապշում: Իսկ մենք արդեն վաղուց չենք էլ զարմանում: Մեզ համար զավեշտալի է դարձել նման իրավիճակը: Եթե որոշակիացնենք, ապա այս նախագծի ձախողման պատճառը, ինչպես միշտ, արտաքին գործերի նախարարությունն է, թեպետ մի շարք վերապահումներով մեղավորների ցանկում կարելի է ընդգրկել նաև տրանսպորտի և կապի նախարարությանը: Եվ հետո, բոլորն ասում են, թե մենք ինչ-որ բանի ենք սպասում: Ո՞ւմ կամ ի՞նչ ենք սպասում: Սպասողականությունը կարող է նշանակել իմաստություն, սառնասրտություն, սակայն դա մեր պետությանը չի վերաբերում: Մեզ համար սպասողականությունն անգրագիտություն է, իրականության զգացումի կորուստ, իսկ ամենավատն այն է, որ հայերը ցանկացած հարցում սպասում են «վերևների դաբրոյին»` մոռանալով, որ այսպես շարունակվելու դեպքում մենք միշտ բոլորի համար ներքևում ենք լինելու:

Նոր տրանսպորտային միջանցքը նախատեսված է ԵՄ անդամ պետություններ ապրանքների տեղափոխման համար՝ շրջանցելով Թուրքիան: Իսկ թե իրականում ով շրջանցվեց` արդեն հասկացանք: Եվ այսպես կշարունակենք շրջանցվել, քանի դեռ ԱԳՆ ղեկավարը Նալբանդյան Էդիկն է, որը, չնայած փայլուն կարծիք ունի իր մասին, այնուամենայնիվ, արտաքին էֆեկտներ ստեղծելուց բացի (հպարտորեն շենք մտնել նախօրոք բացված դռնով, լուրջ դեմք ընդունել, լուրջ թեմաների վերնագրեր արտասանել և այլն), ոչ մի բանի, ոչ մի ռեալ գործի ունակություն չունի: