2016թ. հունվար-ապրիլին ՀՀ-ում խմիչքների արտադրության ծավալը կազմել է 28.64 մլրդ դրամ ՝ 2015-ի հունվար-ապրիլի համեմատությամբ աճելով 21%-ով։ 4 ամսում ՀՀ-ում համարյա 555 հազար լիտր վիսկի է արտադրվել, ինչը 3 անգամ գերազանցում է 2015-ի հունվար-ապրիլի ցուցանիշը (187.2 հազար լիտր)։ Վիսկիի արտադրությունը ՀՀ-ում սկսվել է 2014-ին, և այդ խմիչքի արտադրությամբ զբաղվում է գործարար պարոն Լֆիկին՝ Սամվել Ալեքսանյանին պատկանող «Ալեքս Գրիգ» ընկերությունը։ Խմիչքը ներքին շուկայից բացի արտահանվում է Իրաք: 

Այս տեղեկությունն այնքան արժեքավոր չէր լինի, եթե դրանում ներառված չլիներ երկու կարևոր հանգամանք՝ վիսկի արտադրողը պարոն Լֆիկն է, և այն արտահանվում է Իրաք: Ցանկացած մեծ և փոքր հայաստանցի գիտի, թե ինչ է նշանակում «լֆիկի օղի» բառակապակցությունը: Առաջին հերթին, բոլորս մտածում ենք, որ այդ խմիչքից պետք է հեռու մնալ, քանզի դա շատ անորակ և առողջության ու կյանքի համար վտանգավոր հեղուկ է: Նույնը կարելի է ասել ցանկացած ապրանքատեսակի մասին, որն արտադրվում է պարոն Լֆիկի ձեռնարկություններում: Բացառություն չէ նաև վիսկին: Սակայն զարմանալին այն է, որ պարոն Լֆիկը որոշել է վիսկին արտահանել: Դա նշանակում է, որ նա շուտով նաև օղին էլ է արտահանելու: Դա լավ է մեզ համար: Վերջապես կազատվենք թույնից և գենոֆոնդին սպառնող վտանգից: Սակայն խմիչքի արտադրությունը չի դադարեցվելու՝ այն ուղղակի արտահանվելու է: Ինչո՞ւ: Որովհետև պարոն Լֆիկը ապաշխարհեց, ինչի արդյունքում վերջապես բացահայտվեց իր անսահման հայրենասիրությունը և աշխարհաքաղաքական հզոր մտածելակերպը: Բանն այն է, որ նա որոշել է իր արտադրած խմիչքը արտահանել Իրաք: Այդպիսի բան չէին մտածել անգամ աշխարհի գերտերությունները: Իրաքը մասնատված է, երկրի մեծ մասը «Իսլամական պետություն» խմբավորման ձեռքում է: Պարոն Լֆիկի մտահաղացմամբ` նրա արտադրած վիսկի կոչվող հեղուկը իսպառ կոչնչացնի զինյալներին: Ավելին, խմելով պարոն Լֆիկի վիսկին` իսլամականները կվտանգեն իրենց գենոֆոնդը և շուտով կվերանան աշխարհի երեսից: Փաստորեն այն, ինչ արդեն քանի տարի է չի հաջողվում իրականացնել ԱՄՆ-ին, Ռուսաստանին և այլ գերհզոր պետություններին, հաջողվելու է պարոն Լֆիկին: Իրաքը, ինչպես նաև ամբողջ աշխարհը, նրա շնորհիվ կազատվեն չարիքից: Սակայն պարոն Լֆիկը դրանով չպետք է բավարարվի, քանզի կան բազմաթիվ այլ ահաբեկչական կառույցներ, որոնք ահ ու սարսափ են տարածում աշխարհում: Նա պետք է ընդլայնի արտադրությունը, քանզի առայժմ աշխարհը հանգիստ չէ: