Գրեթե օր չկա, որ մենք չլսենք առողջապահական հաստատություններում բժիշկների մեղքով մահվան դեպքերի, հարազատների բողոքների, դատական քաշքշուկների մասին: Դեպքեր են լինում, երբ մարդիկ նույնիսկ ծեծի են ենթարկում բուժաշխատողներին, և այդ ժամանակ առողջապահության նախարարությունը հանդես է գալիս ընդարձակ տեքստերով՝ դատապարտելով նրանց, ովքեր համարձակվում են ձեռք բարձրացնել ամենամարդասիրական մասնագիտության տեր անձանց վրա: Բայց արդյո՞ք միշտ մեղավոր են քաղաքացիները, և արդյո՞ք այդ համակարգում ամեն ինչ բարվոք է:

Այս հարցերից մեկի պատասխանը թերևս հնարավոր լինի գտնել այսօր հրապարակված այն հաղորդագրության մեջ, ուր ասվում է, որ Մխիթար Հերացու անվան պետական բժշկական համալսարանի անվտանգության ծառայության պետ Վանիկ Գինոսյանը կալանքի տակ Է։ Վերջինս կալանավորվել է համալսարանում հայտնաբերված չարաշահումների դեպքի առթիվ ԱԱԾ-ում քննվող քրեական գործի շրջանակներում։ Ինչպես տեղեկացրել է ԱԱԾ մամուլի խոսնակ Սամսոն Գալստյանը, քննությամբ պարզվել Է, որ Վ. Գինոսյանը որոշ ուսանողների ապահովել է գումարի դիմաց դրական գնահատականներ ստանալը։

Այս բացահայտումն իր մեջ մի քանի շերտեր է պարունակում: Այն, որ անվտանգության աշխատակիցը կարող էր գնալ նման քայլի, դա հասկանալի է: Բայց նկատենք, որ եթե Գինոսյանը նման փորձ է արել, ուրեմն եղել են նաև դասախոսներ, ովքեր պատրաստակամորեն կատարել են նրա վճարովի խնդրանքը: Սրան էլ գումարենք այն փաստը, որ Գինոսյանը կարծես թե ուսանողների պակաս էլ չի զգացել, սովորողներ, որոնք մեծ ցանկություն են ունեցել գնահատվել ոչ թե իրենց գիտելիքների շնորհիվ, այլ գրպանի պարունակության: Եվ ահա հենց այս եռաշերտ շղթայի արդյունքում էլ բուժհաստատությունները լցվում են մարդկանցով, ովքեր իրենց տգիտությամբ և թերի գիտելիքներով խաղում են մարդկային ճակատագրերի ու կյանքի հետ: Եվ ամենամարդասեր մասնագետը միանգամից վերածվում է դահիճի: