Մի քանի օր առաջ Երևանում մի անսովոր լուր տարածվեց: Ոմանք պնդում էին, թե ՀՖՖ նախագահ Ռուբեն Հայրապետյանը մահացել է: Ասեկոսեները սկիզբ առան այն բանից հետո, երբ լուրեր տարածվեցին, որ նա առողջական լուրջ խնդիրներ ունի: Որոշ ժամանակ առաջ էլ տեղեկություն տարածվեց, որ Հայրապետյանը բնակություն է հաստատել Արցախում, և նրա քիչ երևալը բացատրվում էր այս հանգամանքով: Հետո, իհարկե, այդ տհաճ լուրն արագ հերքվեց, նույնիսկ ճշտվեց, որ Հայրապետյանը ոչ միայն ողջ-առողջ է, այլև ավելին՝ մասնակցել է հավաքականի մարզումներին: 

Իսկ այսօր առիթ եղավ լսելու հաջորդ ցավալի լուրը, բայց այս անգամ ոչ թե բամբասանքի կարգով, այլ իրական: Ֆուտբոլի Հայաստանի ազգային հավաքականը երկրորդ պարտությունը կրեց 2018թ. աշխարհի առաջնության ընտրական մրցաշարում: Երևանի «Հանրապետական» ստադիոնում տեղի ունեցած երկրորդ տուրի խաղում մեր թիմն ընդունեց ռումինացիներին և պարտվեց խայտառակ՝ 0:5 հաշվով:

Ստացվում է, որ հանգուցյալ, այնուամենայնիվ, կա, և դա հայկական ֆուտբոլն է: Ռուբեն Հայրապետյանն անհամեմատ ավելի երկարակյաց գտնվեց ու անձամբ մասնակցեց այդ սպորտաձևի հուղարկավորման արարողությանը: Իսկ թե ինչից վախճանվեց հանգուցյալը, այդ մասին Հայրապետյանը բոլորից լավ գիտի: