ՀՀ գյուղատնտեսության նախարար Իգնատի Առաքելյանն օր օրի նոր անակնկալներ է մատուցում ինչպես իրեն վստահված ոլորտում, այնպես էլ մարդկանց, որոնք ակամա դառնում են նրա լսարանը: Բանն այն է, որ Առաքելյանը վերջին շրջանում սկսել է շատ զարմանալի, հակասական, իսկ երբեմն էլ բովանդակազուրկ մտքեր արտահայտել: Այսօր նույնպես բացառություն չէր:

Խոսելով լրագրողների հետ՝ նախարարն ասել է, թե իր նախորդի սխալները չի ցանկանում ուղղել, այլ կկառուցի նոր հիմքեր և առաջ կգնա: Առաքելյանը հավանաբար չի պատկերացնում, թե ինչ բան է սխալը կառավարման ոլորտում: Դա հաստատ լեգո խաղը չէ, որտեղ սխալ հավաքված դետալները կարելի է մի կողմ նետել ու նորը հավաքել: Այստեղ յուրաքանչյուր սխալի, բացթողնման, չարաշահումի թիկունքում մարդկային ճակատագրեր են, կորստի մատնված միջոցներ, անդառնալի վնասներ: Էլ չենք խոսում այն մասին, որ նախորդի սխալներ ուղղելը նաև ենթադրում է պատասխանատվության ենթարկել նրանց, ովքեր այդ սխալների հեղինակներն են: Սակայն Իգնատի Առաքելյանին դա հետաքրքիր չէ, նա որոշել է նորարար դառնալ, նոր մոլորակներ հայտնաբերել գյուղատնտեսության ոլորտում: Ու երբ նախարարին ասում են, որ, օրինակ, դիզվառելիքի և պարարտանյութերի ոլորտում որոշակի ուսումնասիրություններ արվել են, և պարզվել է, որ դրանք աննպատակահարմար են ծախսվում, այստեղ նույնպես Առաքելյանը մատը մատին չի ցանկանում հարվածել: Փաստն առկա է, արդյունքները ներկայացված են, իսկ մարդը հայտարարում է, թե համաձայն չէ այն մտքին, որ անիմաստ հատկացումներ են արվել: Նրա խոսքով՝ «ոչ ոք անիմաստ ոչինչ չի արել, իսկ այսօր փոխելու ժամանակն է»:

Դե, արի ու հասկացիր, թե ինչ իմաստ կա փոխել մի բան, ինչն անիմաստ չի եղել: Իսկ եթե իմաստ եղել է, ուրեմն ի՞նչ է ստացվում՝ նախարար Իգնատի Առաքելյա՞նն է անիմաստը: