Առողջապահության նորանշանակ նախարար Լևոն Ալթունյանն իր պաշտոնավարման կարճ ժամանակահատվածում առանձնապես աչքի չի ընկել կառավարման հմտություններով, բայց մի հարցում գերազանցել է բոլոր սպասելիքները: Ամենաարագը, որ կարողացավ գլուխ բերել Ալթունյանը, դա 25 բժշկական կազմակերպության հետ լրացուցիչ համաձայնագրեր կնքելն էր: Համաձայն դրանց, պետության կողմից երաշխավորված անվճար բժշկական օգնության և սպասարկման շրջանակներում բնակչության սոցիալապես անապահով և հատուկ խմբերում ընդգրկված քաղաքացիների դժվարամատչելի ախտորոշիչ հետազոտությունների իրականացման համար տրվելու է 134,0 մլն դրամ: Եվ ահա Ալթունյանը փողը բաժանեց իր սրտի ուզածի պես:

Ամենամեծ մասը՝ 24 միլիոնը, նա բաժին հանեց «Վարդանանց» բժշկական կենտրոնին, այսինքն՝ հենց ինքն իրեն, քանի որ դա պատկանում է «ԱՐԻՆՏԵՐԼԵՎ» ՍՊԸ-ին, իսկ այս ընկերությունը հիմնադրել է Ալթունյանը: Հետո հերթը հասավ ազդեցիկ մտերիմներին: Օրինակ, 23 միլիոն դրամ հատկացվել է «Նաիրի» բժշկական կենտրոնին, որն էլ իր հերթին պատկանում է առողջապահության նախկին նախարար Հարություն Քուշկյանին: Այնուհետև իրեն հասանելիք միլիոնները ստացավ առողջապահության նախկին նախարար Արմեն Մուրադյանի և Ամենայն Հայոց կաթողիկոս Գարեգին Բ-ի անվան հետ կապ ունեցող «Իզմիրլյան» բժշկական կենտրոնը:

Ինչպես տեսնում ենք, կառավարության նորանշանակ անդամները հրաշալիորեն կյանքի են կոչում արդարության ու հավասարության սկզբունքը՝ միայն այն տարբերությամբ, որ գերազանցապես առաջնորդվում են սեփական շահերով: Եվ հենց սա էլ կոչվելու է Կարեն Կարապետյանի բարեփոխումների գրավական: