Այսօր «Օհանյան–Րաֆֆի–Օսկանյան» դաշինքը նորից հայտարարություն էր տարածել: Խորհրդարանական ընտրությունների արդյունքների ամփոփումից հետո արդեն հնարավոր չէ հաշիվը պահել, թե քանի անգամ է դաշինքը զանազան առիթներով գրավոր դիմում արել հանրությանը: Հիմա էլ խոսքն այն մասին է, թե ապրիլի 2-ի կեղծված ընտրություններին հետևեցին իշխանությունների ոչ պակաս զազրելի գործողությունները: Հայտարարության մեջ հիշեցվում է, որ Վարչական դատարանը մերժել էր ՕՐՕ-ի հայցադիմումը մատնահետքերի մասին: Հիշել են, որ ապրիլի 12-ին Վճռաբեկ դատարանը մերժել էր Վերաքննիչ դատարանի կողմից Անդրիաս Ղուկասյանի հանդեպ կալանքի կիրառման և գրավի միջնորդության վերաբերյալ մերժման դեմ բողոքը: Հիշել են, որ ՀՀԿ-ական ուսուցիչների կողմից ադմինիստրատիվ ռեսուրսի չարաշահումը բացահայտած «Իրազեկ քաղաքացիների միավորում» ՀԿ-ի դեմ 30 ուսուցիչների կողմից հայցեր են ներկայացվել: Եվ նույնիսկ ՍԱՍ-ի Արտակին չեն մոռացել` իր աղմկահարույց ձայնագրությամբ հանդերձ:

Այս բոլոր հին ու նոր հիշողությունների պատճառը մեկն է: ՕՐՕ-ն ցանկանում է ասել, որ «դատապարտում է վերը թվարկված բոլոր ապօրինությունները և իր զորակցությունն է հայտնում բոլոր քաղբանտարկյալներին ու քաղաքական հետապնդումների ենթարկվող քաղաքացիներին և կազմակերպություններին»: Բայց եթե մի փոքր անկեղծություն լիներ, ապա ՕՐՕ-ն անպայման կհավելեր, որ նշված երկար-բարակ թվարկումներով ընդամենը ցանկացել է բացատրություն գտնել իր պարտության համար ու մեղքը բարդել ընտրակեղծիքների վրա, որոնք եթե չլինեին, ապա իրենք հաստատ խորհրդարանում մեծամասնություն կկազմեին:

Նրանք, ովքեր ծանոթ են ՕՐՕ-ին ու վերջինիս հնարավորություններին, շատ լավ հասկանում են, որ աշխարհի ամենաարդար ընտրությունների պարագայում էլ այդ դաշինքը նույն բախտին էր արժանանալու: Սակայն հիմա մարդկանց մտահոգում է ոչ այնքան անցած փուլը, որքան ներկան, իսկ ավելի ճիշտ` մի դրվագ, որն առնչվում է այս պահի հետ: Ո՞վ է գրում ՕՐՕ-ի այս հայտարարությունները: Որքան հայտնի է, Րաֆֆի Հովհաննիսյանն ու Վարդան Օսկանյանը երկրից հեռացել են, Սեյրան Օհանյանը ծանր ընկճախտի մեջ է, մյուս ՕՐՕ-ականները ցրվել են տներով` մտահոգված իրենց վաղվա օրվա համար: Եվ ուրեմն, ո՞վ է այն վերջին նվիրյալը, ով դեռ չի հանգստացել և շարունակում է իր պայքարը` գրիչը ձեռքին: