ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանն օրերս ի պաշտոնե հայտարարեց, որ մարդկանց անհանգստությունը, թե մոտակա օրերին ցրտահարություն է սպասվում, անհիմն է: «Ցրտահարությունների վտանգը հանրապետության հովտային և նախալեռնային գոտիներում կարող եք համարել ավարտված»,- հայտարարեց նա: Եվ ահա այս հանգստացուցիչ տեղեկությունը ստանալուց անմիջապես հետո Տավուշի մարզից լուրեր ստացվեցին, որ այնտեղ ցրտահարության հետևանքով վնասվել են մրգատու ծաղկած ծառերը, կարտոֆիլը ու բանջարաբոստանային կուլտուրաները: Մարզի Դեղձավան համայնքում 15-20 տոկոս է վնասը, կարալյոկը, կարտոֆիլը, սալորը և բանջարաբոստանային կուլտուրաներն են վնասվել ցրտահարությունից: Վնասներ են կրել նաև Հաղթանակ, Արճիս, Աչաջուր, Պտղավան համայնքների մրգատու ծաղկած ծառերը:

Նման իրավիճակներում մարդիկ առավեելապես մտածում են այն մասին, թե ինչպես կարելի է փոխհատուցում ստանալ վնասների դիմաց: Իսկ ինչ վերաբերում է մեղավորներին, ապա այս դեպքերում դա միշտ էլ մնում է ստվերում: Դե, եղանակ է, ի՞նչ կարող ես անել: Մինչդեռ ԱԻՆ հիդրոմետ ծառայությունը պատահածի համար մեղքի մեծ բեռ ունի: Այդ ծառայությունը ստեղծված է ու ֆինանսավորվում է հենց այն նպատակով, որ քաղաքացիներին առավելագույնս ամբողջական ու հավաստի ինֆորմացիա փոխանցի հնարավոր եղանակային ճգնաժամերի մասին: Հիդրոմետը տարածել է սխալ տեղեկատվություն, հողագործներն էլ միջոցներ չեն ձեռնարկել իրենց բերքը ցրտից պաշտպանելու ուղղությամբ: Եվ ուրեմն, հենց այդ ծառայությունն էլ ամբողջապես պիտի կրի վնասների փոխհատուցման ծանրությունը: Հակառակ դեպքում օդերևութաբանության կենտրոնը կնմանվի նախկին վարչապետ Տիգրան Սարգսյանի ներդրած հակակարկտային կայանքներին, որոնք ինչքան շատ էին կրակում, այնքան կարկուտն ավելի առատ ու աղետալի էր լինում: