Գեներալ Մանվել Գրիգորյանն աստվածավախ է դարձել: Նրան սկսել են առավել հաճախ տեսնել սրբավայրերում կամ հոգևորականներով շրջապատված: Եվ զարմանալի չէ, որ վերջին շրջանում նրա կյանքի կարևոր իրադարձությունները կատարվում են հենց վանքերում ու եկեղեցիներում: Օրինակ, այսօր լրատվամիջոցները գրեցին այն մասին, որ օրերս Մայր Աթոռում Գարեգին Բ-ի մատուցած պատարագից հետո վեհափառն իր օրհնած եկեղեցական դրոշն է հանձնել ԵԿՄ ղեկավարին:

Բայց դա միակ «աստվածային» պարգևը չի եղել, որ տրվել է գեներալ Մանվելին: Պարզվում է, որ հենց նույն վայրում նա ստացել է նաև իր պատգամավորական մանդատը: Իսկ սա արդեն շատ հետաքրքիր է, եթե հաշվի առնենք, թե ով է իրականացրել հանձնման առաքելությունը: Այդ բարձր պատիվը տրվել է ԱԺ փոխնախագահ Էդվարդ Շարմազանովին, ում հատուկ կարգով գործուղել են Էջմիածին:

Մանվել Գրիգորյանի անձի հանդեպ այսպիսի ընդգծված ու բացառիկ ուշադրությունը բազմաթիվ պատճառներ ունի: Սակայն տվյալ պարագայում հետաքրքրականն այլ բան է: Եկեղեցու հարկի ներքո մանդատ ստացող գեներալ օրենսդիրն ինչ-որ առումով նույնանում է Գարեգին Երկրորդ կաթողիկոսի հետ: Երկուսն էլ ներկայացնում են կառույցներ, որոնք պիտի ծառայեն երկրին ու ժողովրդին, սակայն երկուսն էլ նախապատվությունը տվել են իշխանություններին ծառայություններ մատուցելու տարբերակին: Այս իմաստով Մայր Աթոռում մանդատ ստացող գեներալի վիճակը նույն է, եթե կաթողիկոսի ձեռնադրությունը տեղի ունենա Ազգային ժողովում: