Ամեն մեկը խելագարվում է յուրովի: Խելագարության նշաններ է ցուցադրում նաև Ուկրաինայի նախագահ Պյոտր Պորոշենկոն: Մի մեծ երկրի ղեկավար գնալով նմանվում է հիվանդ մտագարի, որի աչքին սովորական իրերը սկսում են կենդանի հրեշներ թվալ և նա նետվում է դրանց վրա` անխնա ոչնչացնելու մարմաջով:

Երբ Պորոշենկոն իր երկրում VK և OK սոցցանցերի, ինչպես նաև Yandex-ի և Mail.ru-ի արգելափակման հրաման տվեց, դա ծայրահեղություն էր, թեև նման քայլը գոնե բացատրվում էր հակաքարոզչական շարժառիթներով: Բայց Ուկրաինայի ղեկավարի վերջին կարգադրությունը արդեն դուրս է բանական ընկալումներից: Պորոշենկոն հիմա էլ առաջարկել է երկրի տարածքում արգելել Մատրյոշկաները, պելմենին և օղին:

Փայտե տիկնիկների, կերակրատեսակների ու խմիչքի հետ մարտնչող նախագահին եթե նույնիսկ հաջողվի ոչնչացնել ինչ-որ բան, ապա միայն իր մասին եղած լուրջ կարծիքները, իսկ իբրև վերջին վրձնահարված նրանից մեկընդմիշտ հիասթափվածները կարող են ի գիտություն ընդունել Պորոշենկոյի այն հայտարարությունը, թե պետք է անհապաղ «բոլոր արջերին արտաքսել Սիբիր»:

Նման պետական գործչին, ով իր երկրի բարգավաճումը տեսնում է արջեր հալածելու մեջ, պետք է պահել ոչ թե նախագահական նստավայրում, այլ այնտեղ, որտեղ արջերն են բնակվում: Եվ երբ այդ բանը տեղի ունենա, գուցե թե ուկրաինացիներին հաջողվի այդ առիթով օղի խմել, վրայից մեկ-երկու պելմենի ճաշակել ու խորհել այն մասին, որ մարդը ոչ թե փայտե Մատրյոշկա է, որին կարելի է գործածել խաղալիքի պես, այլ մտածող էակ, որն ընդունակ է իր և երկրի բախտը տնօրինել առողջ իշխանության պայմաններում: