Պաշտպանության նախկին նախարար Սեյրան Օհանյանը դժգոհ է լրատվամիջոցներից այն բանի համար, որ իր մասին կեղծ լուրեր են տարածել, գրել են, թե հեռացել է երկրից ու աշխատանքի պիտի անցնի Ռուսաստանում: «Նախ և առաջ ասեմ՝ ես այս ժամանակահատվածում Հայաստանում եմ եղել: Մի քանի օրով ես դուրս եմ եկել Հայաստանից: Լրատվամիջոցներում արծարծվող այն կեղծ տեղեկությունները, որ ես Հայաստանում չեմ, դրսում եմ, աշխատանքի են նշանակել և այլն, և այլն, ճիշտ չէ, նաև անընդունելի է»,- ասում է նա, բայց ոչ մի խոսք չի ասում այն մասին, որ եթե երկրում է եղել անցած երկու ամիսներին, ինչո՞ւ հենց ինքն անձամբ չի հերքել այդ կեղծ տեղեկությունները և ինչո՞ւ է դրա մասին խոսում միայն այսօր:

Իսկ հարցի պատասխանը պարզ է: Սեյրան Օհանյանից երկու ամիս պահանջվեց հստակեցնելու, թե ինքն ինչով պիտի զբաղվի: Եվ երբ նա արդեն որոշում կայացրել է, կարող է հետին ամսաթվով բողոքել լրատվամիջոցներից, իսկ իր ապագայի մասին տեղեկացնել, որ մնում է քաղաքականության մեջ ու պայքարելու է իշխանափոխության համար։ Վերացական մտքեր արտասանելով իր կայացրած որոշման առնչությամբ, դժգոհելով, թե ներկայիս խորհրդարանը չի արտացոլում ժողովրդի կամքը, ՕՐՕ դաշինքի ղեկավարը ոչինչ չի ասել այդ դաշինքի ապագայի մասին, փոխարենը հույսեր է կապել ինչ-ինչ արտախորհրդարանական ուժերի հետ, որոնց միջոցով պիտի իրագործի իր ծրագիրը, որն էլ փաստացի գոյություն չունի: Հենց այդ ծրագրի լիակատար բացակայության վկայությունն է Սեյրան Օհանյանի այն փափագը, որ գուցե թե հանկարծ ինչ-որ հրաշք կատարվի երկրում, ամեն ինչ խառնվի իրար ու այդ քաոսի մեջ իրեն հաջողվի կրկին վերև մղվել: «Ես չեմ բացառում, որ խորհրդարանից դուրս էլ զարգացումներ կձևավորվեն, և խորհրդարանից դուրս զարգացումները կարող են բերել, ինչու չէ, նաև ֆորսմաժորային իրավիճակի»,- իր սրտին հաճո կռահումներ է անում Օհանյանը:

Հիմա արդեն պարզ է, թե առաջիկա տարիներին ինչով պիտի զբաղվի Օհանյան Սեյրանը: Կնստի իր տանը, կնայի պատուհանից դուրս և համբերատար կսպասի, թե ե՞րբ է վերջապես գալու այնքան սպասված ֆորս մաժորը: Լավ կլինի, եթե պարապությունն անցկացնի Զբիգնև Բժեզինսկու «կառավարելի քաոսի» տեսության ուսումնասիրությամբ: Միգուցե ի վիճակի կլինի սովորել…