ՀՀ պաշտպանության նախկին նախարար Սեյրան Օհանյանը խանդով է վերաբերվում գործող նախարար Վիգեն Սարգսյանին: Սա ոչ միայն հասկանալի է, այլ ինչ-որ տեղ նույնիսկ բնական: Սակայն արի ու տես, որ Օհանյանի խանդը սոսկ զգացմունքային դաշտով չի սահմանափակվում: Վերջինս որոշել է հարվածել ցավոտ տեղին և ավելի հարմար բան չի գտել, քան Վիգեն Սարգսյանի առաջարկած «Ես եմ» ու «Պատիվ ունեմ» ծրագրերը։ 

Սեյրան Օհանյանն ասում է. «Պատիվ ունեմ» ծրագիրը մի քանի տարի է գոյություն ունի, պարզապես որոշակի առանձնահատկություններով այն ներդրվել է կրկին։ Իսկ «Ես եմ»-ի գաղափարը միշտ էլ եղել է. այսօր զինված ուժերի ղեկավարությունը ժամկետային զինծառայողներին ներգրավելու ուղղությամբ որոշակի աշխատանքներ տանում է, ես հաջողություն եմ մաղթում իրենց»։ Եթե այլ կերպ ձևակերպենք նախկին նախարարի պնդումները, ապա նա փաստացի վիճարկում է հիշյալ ծրագրերի հեղինակային իրավունքը և Վիգեն Սարգսյանին անուղղակիորեն մեղադրում է գրագողության մեջ:

Հիմա երկու նախարարներն էլ խնդրի առաջ են հայտնվել: Սարգսյանը ստիպված պիտի լինի ապացուցել, որ երկու ծրագրերն էլ ծնվել ու կյանքի են կոչվում իր օրոք և դրանց գաղափարը մեկ ուրիշից փոխառելու խնդիր իր առաջ չի դրել: Իսկ Սեյրան Օհանյանի անելիքն էլ ավելի բարդ է լինելու: Նա էլ ստիպված է բացատրություն տալ, որ եթե «Ես եմ» ու «Պատիվ ունեմ» ծրագրերն իր օրոք արդեն կային, ապա ինչու ոչ ոք դրանց արդյունքը չտեսավ: