Ամեն ոք փողոց դուրս գալու իր դրդապատճառներն ունի: Փողոցային կյանքին է կարոտել նաև ԱԺ «Ելք» խմբակցության պատգամավոր, «Հանրապետություն» կուսակցության նախագահ Արամ Սարգսյանը, որ հայտարարել է, որ եթե Սերժ Սարգսյանը 3-րդ ժամկետի գնա՝ վարչապետ դառնալով, ու եթե ժողովուրդը ի նշան բողոքի դուրս գա փողոց, «Ելքը» քաղաքական պատասխանատվություն կվերցնի իր վրա այդ շարժումն առաջնորդելու մինչև վերջ: «Սերժ Սարգսյանի 3-րդ ժամկետ գնալը հիասթափության, հուսահատության, գաղջ այնպիսի մթնոլորտ է ձևավորելու, որը որևէ կերպ վերականգնել հնարավոր չի»,- հավելել է Սարգսյանը:

Թե որտեղ Արամ Սարգսյանը կանցկացնի առաջիկա գարնանային իր օրերը, դա իր խնդիրն է: Բայց նրա հայտարարության ամենահատկանշական հատվածը ոչ թե բողոքելն է, այլ այն հավակնությունը, որ հատկապես «Ելքը» պիտի առաջնորդի ընդդիմադիր ուժերին: Սարգսյանը հավանաբար մոռացել է այն աղաղակող փաստը, որ մինչ այժմ «Ելքի» որևէ նախաձեռնութան որևէ քաղաքական ուժ ոչ աջակցել է, ոչ միացել` այս դաշինքին համարելով կեղծ ընդդիմություն: Իսկ եթե սրան էլ հավելենք այն, որ երբ օրերս «Հիմնադիր խորհրդարանի» առաջնորդ Ժիրայր Սեֆիլյանը բանտից հասցեական դիմում ներկայացրեց հասարակական ու քաղաքական գործիչներին՝ կոչ անելով ստեղծել ազգային դիմադրության ճակատ և ժողովրդական ընդվզման նախապատրաստվել, այդ ցանկում Արամ Սարգսյանի անունը բացակայում էր, ապա առավել հստակ կդառնա, որ Արամը գուցե և փողոց դուրս գա, բայց նա փողոցում կլինի իր հպարտ միայնության մեջ: