Նա, ով սիրում է քչփորել ուրիշների կենսագրությունները, պիտի կռահի, որ մի օր էլ ինչ-որ մեկի մտքով կանցնի տնտղել իր կենսագրության ծալքերը: Իսկ եթե ապրած տարիների մեջ, ինչպես ասում են, ամեն ինչ այնքան էլ հարթ ու ամբասիր չի եղել, այդ դեպքում պատասխան հարվածը չի ուշանա, ինչպես որ դա պատահեց պաշտպանության նախարար Վիգեն Սարգսյանի հետ: Մի քանի օր առաջ խորհրդարանի ամբիոնից որոշ պատգամավորների մութ անցյալը բացահայտող նախարարն այսօր հայտնվել է ճիշտ այդպիսի անհարմար կացության առաջ: Իսկ դրա համար մեծ ջանքեր պետք չեն եղել: Մարդիկ ընդամենը թերթել են նրա պաշտոնական կենսագրությունը:

Օրինակ, Վիգեն Սարգսյանի կենսագրության մեջ գրված է, որ նա 1992-96 թթ. սովորել է Սանկտ-Պետերբուրգում: Դա, ինչ խոսք, վատ չէ: Վատն այն է, որ նույն թվերին` այսինքն 1992-97թթ. մեր ուսումնատենչ Վիգենը սովորել է նաև Երևանի Պետական համալսարանում: Հիմա կարող եք ասել` ոչինչ բացառել չի կարելի, գուցե երիտասարդը բուհերից մեկը հեռակայել է: Լավ, ենթադրենք թե այդպես է, մարդը կաշվից դուրս է եկել միաժամանակ երկու բուհի դիպլոմ ձեռք բերելու համար: Բայց կաշվից դուրս գալն էլ իր սահմաններն ունի, որովհետև պաշտպանության նախարարի դեպքում դա չափից ավելին է:

Բանն այն է, որ երկու տեղ սովորելու հետ զուգահեռ նա 1995-98թթ. աշխատել է նաև ԱԺ նախագահի օգնական: Այսինքն` կամ դասի չի գնացել և գիտեիք ձեռք չի բերել, կամ աշխատանքից է բացակայել, քանի որ որքան էլ անսահման լինեն մարդկային հնարավորությունները, դեռ ոչ մեկին չի հաջողվել ֆիզիկապես բաժանվել երեք մասի: Բայց Վիգեն Սարգսյանն այս գերմարդկային ձեռքբերումով չի բավարարվել: Առաջ անցնելով արդեն կարող ենք նկատել, որ, օրինակ, 1998-ին նա սովորում էր ԵՊՀ-ի մագիստրատուրայում, բայց դրա հետ մեկտեղ սովորում էր նաև Ֆլետչերի դպրոցում: Ահա այսպես` զուգահեռ իրականությունների մեջ դեգերելուց հետո նա վերջապես 2000 թվականին ավարտել է իր կրթական ոդիսականը: Ավարտել է, երբ 25 տարեկան էր ու… այնուամենայնիվ բանակ չի գնացել, թեև սա բոլորովին այլ թեմա է: Եվ այդ թեման անկասկած պիտի քչփորեն, քանի որ նախարարն ինքը կենսագրությունները տակնուվրա անելու առաջին օրինակը տվեց: