Բոլորի համար շատ անսպասելի ՀՀ բնապահպանության նախարարությունը հանկարծ շրջանառության մեջ դրեց «Փոքր հիդրոէլեկտրակայանների կառուցման և շահագործման համար արգելված գոտիները և գետերի ցանկը հաստատելու մասին» որոշման նախագիծը, որի ընդունմամբ կարգելվի փոքր հէկերի կառուցումը Հայաստանի 22 գետի վրա: «Փոքր հիդրոէլեկտրակայանների կառուցման և շահագործման ընթացքում առաջացել են էկոլոգիական ու սոցիալ-տնտեսական լուրջ խնդիրներ, որոնք ոլորտը դարձրել են բարձր ռիսկայնության և հրատապ լուծում են պահանջում»,- նշված է որոշման նախագծի հիմնավորման մեջ: Այնուհետև ասվում է, որ նախագծով նախատեսվում է արգելել ՓՀԷԿ-երի կառուցումը Գավառագետի, Ծակքարի, Լիճքի, Կարճաղբյուրի (Մաքենիս), Մասրիկի, Վարդենիսի, Արգիճիի, Մարտունիի, Ձկնագետի, Հրազդանի, Աղստևի, Ախուրյանի, Որոտանի, Արփայի, Ձորագետի, Եղեգիսի, Ազատի, Մարցի, Գոշի, Մեղրիգետի, Ողջի գետի Կապուտջուղ և Քաջարանց վտակների վրա:

Սա գրեթե աներևակայելի նախաձեռնություն է, որի հաջողությանը կասկածողների մեծ բանակ կա: Պատճառները շատ են, բայց գլխավոր պատճառն այն է, որ թվարկված վայրերում արդեն իսկ գործում են բազմաթիվ ազդեցիկ դեմքերի և օլիգարխների սեփականություն հանդիսացող հէկեր: Այդ ջրերն են զավթել մասնավորապես ՀՅԴ բարձրաստիճան դեմքերը՝ ՀՅԴ բյուրոյի ներկայացուցիչ Հրանտ Մարգարյանը, ԿԳ նախարար Լևոն Մկրտչյանը, տարածքային կառավարման և զարգացման նախարար Դավիթ Լոքյանը: Այդ գետերի վրա հէկ ունեն անգամ ԱԺ «Ծառուկյան» խմբակցության քարտուղար Վահե Էնֆիաջյանի ընտանիքը, Վանաձորի նախկին քաղաքապետ Սամվել Դարբինյանը և այլք: Իսկ փակման նախաձեռնողն էլ դաշնակ Արծվիկ Մինասյանն է, ինչն իր հերթին թեման նետում է ֆանտաստիկայի գիրկը:

Սակայն իրականությունն ունի ևս մի զավեշտալի կողմ: Բանն այն է, որ 22 գետերի վրա փոքր հէկերի կառուցումն արգելող նախարար Մինասյանը շատ պատահաբար մոռացության է տվել այն փաստը, որ Սիսիանի Սարավան գյուղով անցնող Դարբ գետի վրա կառուցված հէկը իր իսկ սեփականությունն է, և եթե հէկերը վնաս են պատճառում շրջակա միջավայրին, ապա չի կարող լինել այնպես, որ ուրիշների հէկերը վնասակար լինեն, իսկ դաշնակ Արծվիկինը` օգտակար: