ՀՀԿ խմբակցության պատգամավոր Արկադի Համբարձումյանին պատկանող «Սլավմեդ» բժշկական կենտրոնն արդեն երկար ժամանակ է, ինչ ձեռք է բերել «դիարանի» համբավ: Այս հաստատության պատերի ներքո մի քանի ծննդկանների ու նորածինների մահվան փաստերը, դրանց շուրջ բարձրացված աղմուկն ու դատական պրոցեսները այնքան ծանր են հարվածել կենտրոնի համբավին ու Դերժավի Արկադի գրպաններին, որ իրավիճակը դարձել է փակուղային: Մարդիկ սկսել են հեռու փախչել «Սլավմեդ»-ից և իրենց կյանքը, առողջությունը, երեխաների ապագան վստահում են այլ բուժհիմնարկների:

Այս կացությունից ելք գտնելու համար Արկադի Համբարձումյանը երկար մտածելուց հետո հանգել է այն եզրակացության, որ կորուստները վերադարձնելու միակ միջոցը մնացել է մեկ անգամ ևս մարդկանց մոլորության մեջ գցելը: Իսկ դրա ամենատարածված գործիքը վճարովի գովազդն է: Ինչպես ասում են, փողին մունաթ: Ընդամենը պետք է ցույց տալ այդ փողը, և բոլոր այն լրատվամիջոցները, որոնք երեկ բողոքում էին նրա բժշկական կենտրոնից և թունդ խոսքերով հայհոյում Դերժավի Արկադին, հիմա կսկսեն նրա գովքն անել և «Սլավմեդ»-ի մասին ասել, թե աշխարհում սրա պես ծննդատուն ոչ եղել է, ոչ էլ կլինի:

Արկադի Համբարձումյանն իր սև գործն արել է: Այսօր բազմաթիվ կայքեր ու ԶԼՄ-ներ հրապարակել են բազմաթիվ գեղեցիկ լուսանկարներով և ածականներով լեցուն մի տեքստ, որտեղ բառացիորեն հետևյալն է ասվում. «Սլավմեդ» բժշկական կենտրոնն այսօր շատ կանանց համար դարձել է սիրելի վայր, որտեղ նրանք կարող են բարձրակարգ մասնագետների օգնությամբ հղիության ամբողջ ընթացքն անցկացնել առանց բարդությունների: Ապագա մայրիկներն այստեղ հոգատար վերաբերմունքի շնորհիվ կարողանում են իրենց հարմարավետ ու լավ զգալ»: Այսպիսի հուզիչ նախաբանից հետո գալիս են հեքիաթները, լեգենդներն ու առասպելներն այն մասին, թե ինչ հրաշալի մասնագետներ ու անձնակազմ կա «Սլավմեդ»-ում, որ այնտեղ ամեն ինչ անվճար է, որ ծննդատունը ներդրել է տան մոդելը, այստեղ հղիներն իրենց հիվանդասենյակը դիտարկում են որպես տան շարունակություն: Իսկ հետո հաջորդում է տպավորիչ վիճակագրությունը. «Գործելով 2014 թվականից` ընդամենը 3 տարվա ընթացքում «Սլավմեդի» ծննդատունն արձանագրել է ծննդօգնության բավականին լուրջ ցուցանիշ: Ծննդատան բժիշկները մինչ օրս ծնունդ են տվել շուրջ 2000 երեխայի»,- ասվում է գովազդային հոդվածում:

Իսկ թե քանի երեխա ու մայր է մահացել 2014 թվականից ի վեր, Արկադիի փողերից կուրացած թերթերը այս անգամ դա մոռացել են գրել: Հավանաբար հույս ունեն, որ Դերժավի Արկադն իր փողով կարող է նաև մահացածներին վերակենդանացնել: