Արևմուտքի կողմից հրահրված ցնդաբանական հակառուսական հիստերիային միանում է նաև Վրաստանը։ Ավելի ճիշտ՝ Վրաստանին միացնում են։ Մեծ Բրիտանիայում ռուսական հետախուզական ծառայության նախկին աշխատակից Սերգեյ Սկրիպալի թունավորման գործի հետ կապված արդեն 28 երկրներ հայտարարել են ռուս դիվանագետներին արտաքսելու մասին: Եվ այսօր հայտնի դարձավ, որ դրանց է միացել նաև Վրաստանը: «Վրաստանի ԱԳՆ-ն դատապարտում է Մեծ Բրիտանիայի տարածքում քիմիական զենքի կիրառման փաստը, որը մեծ վնաս է հասցրել երեք քաղաքացիների առողջությանը և վտանգել է այլ քաղաքացիների կյանքն ու առողջությունը: ԱԳՆ-ն համերաշխություն է հայտնում Մեծ Բրիտանիային, տվյալ հարցի կապակցությամբ կիսում է Մեծ Բրիտանիայի և միջազգային հանրության դիրքորոշումը և համապատասխանաբար հայտարարում է, որ ցանկալի չէ Վրաստանի տարածքում Շվեյցարիայի դեսպանատանը գործող Ռուսաստանի շահերի բաժանմունքի աշխատակցի գտնվելը»,- ասվում է Վրաստանի ԱԳՆ հայտարարության մեջ:

Այն, որ վրացիներին ևս մտահոգում է նախկին ռուս լրտեսի առողջական վիճակը, սա հասկանալի է: Ամեն օր աշխարհում հազարավոր մարդիկ են բռնությունների, անօրինականությունների, թունավորումների ու սպանությունների զոհ դառնում, բայց Վրաստանը խորապես անհանգստացել է միայն դրանցից մեկի` Սկրիպալի համար, որովհետև վրացական անհանգստությունը հիմա ինքնաբուխ չէ, այն թելադրվում է դրսից: Իսկ սա ոչ մի գնով չես անվանի համերաշխության ակտ: Սովորաբար նման բաներին ասում են ստրկամտություն: Թելադրեցին` կատարեց: Ասացին անհանգստացիր` անհանգստացավ: Ասել են վտարիր` վտարում է: Հավանաբար Թբիլիսիում մի կարգին տեղյակ էլ չեն, թե իրականում ինչ է կատարվել Լոնդոնում: Իրենց ի՞նչ գործն է: Ով ում կուզի` թող սպանի ու թունավորի: Վրացիները միայն արձագանքի տերն են:

Բայց այս պատմության մեջ ամենացավալին այն է, որ մեր հարևան երկրում այդպես էլ չսովորեցին դասեր քաղել դառն պատմություններից: Ընդամենը 10 տարի է անցել այն օրից, երբ նրանք կրկին ընկան Արևմուտքի խելքին և արդյունքում կորցրին երկրի կեսը: Հազիվ էին կարողացել շունչ քաշել այդ հարվածից, փորձում էին ռուսների հետ կրկին ընդհանուր լեզու գտնել, այս օրերին նույնիսկ Ժնևում ռուս-վրացական բանակցություններ էին ընթանում, և ահա, խնդրեմ, մի ինչ-որ Սկրիպալ, ու ամեն ինչ գլորվեց ցեխի մեջ: Ընդ որում, այն նույն ցեխի, որտեղ նրանք արդեն մեկ անգամ թաթախվել էին: Հիմա կկարողանա՞ն կրկին անվնաս դուրս գալ, թե՞ նորից կհաշվեն կորուստները: