Օսկան Քոչարյան

Այսօր հայտնի դարձավ, որ ապրիլի 3-ից Երևանում Գերմանիայի, Բելգիայի, Նիդեռլանդների, Լյուքսեմբուրգի, Ավստրիայի և Շվեդիայի համար ներկայացված Շենգենյան վիզայի դիմումները կընդունի ոչ թե Գերմանիայի դեսպանությունը, այլ նորաբաց «ՎիզաՄետրիկ» կոնսորցիումը: Եղածը հավանաբար որևէ նշանակություն չունենար, եթե չպարզվեր, որ հիշյալ կոնսորցիումը ռուս-թուրքական է։ Այս որոշումը ոչ միայն անսպասելի էր, այլև տպավորություն ստեղծվեց, որ նույնիսկ Հայաստանի իշխանությունների հետ հարկ չէին համարել նախապես խորհրդակցել, այլապես հազիվ թե դրանից ժամեր անց ԱԺ արտաքին հարաբերությունների հանձնաժողովի նախագահ Արմեն Աշոտյանը իր ֆեյսբուքյան էջում գրեր. «Արձագանքելով մեր բազմաթիվ քաղաքացիների անհանգստությանը՝ կապված ԵՄ մի շարք երկրների կողմից մուտքի արտոնագրման համար թուրքական կազմակերպությանը վերապահելու որոշման հետ՝ տեղեկացնում եմ, որ այսօր արտաքին հարաբերությունների հանձնաժողովի անունից գրավոր հարցադրումներով դիմել եմ ՀՀ կառավարությանը»:

Հասկանալի է, որ քաղաքացիների անհանգստությունից ավելի մեծ անհանգստությունը Աշոտյանի ու իշխանությունների համար է, բայց դիվանագիտական էթիկայի կանոների պահպանմամբ լավ է, երբ դա վերագրվում է ժողովրդին: Ամեն դեպքում, գերմանա-թուրքական սադրանքը տեսանելի է նույնիսկ Արմեն Աշոտյանի համար, իսկ դա արդեն նշանակում է, որ վտանգն ակնհայտ է: Ավելի հասկանալի բառերով ասած՝ Գերմանիան պատրաստվում է հայաստանցիների անձնական տվյալները փոխանցել երրորդ երկրի, իսկ տվյալ դեպքում այդ երրորդը Թուրքիան է: Սա էլ իր հերթին նշանակում է, որ մի երկիր, որի հետ չունենք դիվանագիտական հարաբերություն, որը մեզ վերաբերվում է թշնամաբար, այդ երկրին պատկանող ընկերությունը հնարավորություն է ունենում օգտագործելու ՀՀ քաղաքացիների անձնական տվյալները: Իսկ թե ինչպես կարող են օգտագործել՝ դա այնքան էլ դժվար չէ կռահել:

Հայաստանում կա այսպիսի մի կառույց` Անձնական տվյալների պահպանության գործակալություն: Սա այն լիազոր մարմինն է, որը պետք է ապահովի ՀՀ քաղաքացիների անձնական տվյալների մշակման օրինականությունը, ինչպես նաև կարող է թույլ չտալ «ՎիզաՄետրիկ»-ի առնչությունը մեր երկրի հետ:

Հիմա մնում է միայն մի հարց, որ պատախան չունի. «Գերմանիա, ինչո՞ւ ես այդպես վարվում»: Գերմանացիները կբացատրե՞ն: Թե՞ կբացատրեն թուրքերը: